Тропарі, кондаки, прокімени і причасні на весь тиждень
У понеділок, Ангелам
Тропар
Небесних воїнств архістратизи, молим вас присно ми, недостойнії, да вашими молитвами оградите нас кровом крил невещественния вашея слави, сохраняюще нас, припадающих приліжно і вопіющих. от бід ізбавите нас, яко чиноначальници вишніх сил.
Кондак
Архістратизи Божії, служителів Божественния слави, ангелов начальници і человіков наставници, полезноє нам просіте і велію милость, яко безплотних архістратизи.
Прокімен
Творяй ангели Своя духи і слуги Своя пламень огненний.
Причастен
Творяй ангели: Аллилуя.
У вівторок, Предтечі
Тропар
Память праведнаго с похвалами, тебі же довліет свидітельство Господнє, Предтече. Показал бо ся єси воістину і пророков честнійший, яко і в струях крестити сподобился єси Проповіданнаго. Тімже за істину пострадав радуяся, благовістил єси і сущим во аді Бога, явльшагося плотію, вземлющаго гріх міра і подающаго нам велію милость.
Кондак
Прежде неплоди, днесь Христова Предтечу раждает, і той єсть ісполненіє всякаго пророчества. Єгоже бо пророци проповідаша, на Сего во Іордані руку положив, явися Божія Слова пророк, проповідник, вкупі і Предтеча.
Прокімен
Возвеселится праведник о Господі і уповаєт на Него.
Причастен
В память вічную будет праведник, от слуха зла не убоїтся. Аллилуя.
У середу, Хресту
Тропар
Спаси, Господи, люди Твоя і благослови достояніє Твоє, побіди на сопротивния даруя, і Твоє сохраняя крестом Твоїм жительство.
Кондак
Вознесийся на крест волею, тезоіменитому Твоєму новому жительству щедроти Твоя даруй, Христе Боже: возвесели силою Твоєю вірния люди Твоя, побіди дая їм на супостати, пособіє імущим Твоє оружіє мира, непобідимую побіду.
Прокімен
Величит душа Моя Господа, і возрадовася дух Мой о Бозі, Спасі Моєм.
Причастен
Чашу спасенія приіму і імя Господнє призову. Аллилуя.
У четвер, свв. Апостолам
Тропар
Апостоли святії, моліте милостиваго Бога, да прегрішеній оставленіє подаст душам нашим.
Тропар св. Николаю
Правило віри і образ кротості, воздержанія учителя яви тя стаду твоєму, я же вещей істина: сего ради стяжал єси смиренієм високая, нищетою богатая. Отче священноначальниче Николає, моли Христа Бога спастися душам нашим.
Кондак
Твердия і боговіщанния проповідателі, верх ученик Твоїх, Господи, пріял єси в наслажденіє благих Твоїх і покой: болізні бо оних і смерть пріял єси паче всякаго всеплодія, Єдине свідий сердечная.
Кондак св. Николаю
В Миріх, святе, священнодійствитель показался єси: Христово бо, преподобне, Євангеліє ісполнив, положил єси душу ТВОЮ о людех твоїх і спасл єси неповинния от смерті: сего ради освятился єси, яко великий таінник Божія благодаті.
Прокімен
Во всю землю ізиде віщаніє їх і в конци вселенния глаголи їх.
Причастен
Во всю землю ізиде: Аллилуя.
У п’ятницю, Хресту
Тропар і Кондак, як у середу
Прокімен
Возносіте Господа, Бога нашего, і покланяйтеся подножію ногу Єго, яко свято єсть.
Причастен
Спасеніє соділал єси посреді землі, Боже.
У суботу, Всім Святим
Тропар
Апостоли, мученици і пророци, святителів, преподобнії і праведнії, добре подвиг скончавшії, і віру соблюдшії, дерзновеніє імуше ко Спасу, о нас, Того, яко блага, моліте, спастися, молимся, душам нашим.
Тропар заупокійний
Помяни, Господи, яко благ, раби Твоя, і єлика в житії согрішиша, прости: ніктоже бо безгрішен, токмо Ти, могий і преставленним дати покой.
Кондак
Со святими упокой, Христе, душі раб Твоїх, ідіже ність болізнь, ні печаль, ні воздиханіє, но жизнь безконечная.
Яко начатки єстества Насадителю твари вселенная приносит Ти, Господи, богоносния і мученики: їх молитвами в мирі глубоці Церков Твою, жительство Твоє Богородицею соблюди, Многомилостиве.
Прокімен
Веселітеся о Господі і радуйтеся, праведнії.
Причастен
Душі їх во благих водворятся.
Причастен
1. Радуйтеся, праведнії о Господі, правим подобаєт похвала.
2. Блажені, яже ізбрал і пріял єси, Господи, і память їх в род і род.
