«Наша Парафія»

Парафія святого Архистратига Михаїла, Київ, Пирогів

 
БібліотекаБогослужбові книжки, церковні піснеспівиПсалтир давньоукраїнський 1643 року (в українській транслітерації)

По соверше́нії всего́ Псалти́ра і Пíсній Мойсе́ових

По соверше́нії всего́ Псалти́ра
і Пíсній Мойсе́ових,
я́же наєди́ні чтем,
глаголи́:

Досто́йно єст, я́ко воíстину блажи́ти Тя, Богоро́дицу, Присноблаже́нную, і Пренепоро́чную, і Ма́тер Бо́га на́шего.  Честнíйшую Херуви́м і Славнíйшую без сравне́нія Серафи́м, без істлíнія Бо́га Сло́ва ро́ждшую, Су́щую Богоро́дицу Тя велича́єм.

Іли́:

О Тебí ра́дуєтся, Обрадова́нная, вся твар, — Арха́нгелский собо́р і род члове́ческий. Освяще́нния Це́ркви, Ра́ю слове́сний, Дівстве́нная похва́ло, із Нея́же Бог воплоти́ся і Младе́нец бисть — пре́жде вік сий Бог наш; ложесна́ бо твоя́ Престо́л сотвори́, і чре́во Твоє́ пространíйши небес соділа́. О Тебí ра́дуєтся, Обрадова́нная, вся твар, сла́ва Тебí!

Та́же: Трисвято́є і по О́тче наш. Тропарí, глас 6: Поми́луй нас, Го́споди…, і хра́му.

Та́же: Го́споди, поми́луй (четирдеся́т).

І покло́нов п’ятна́десят до землí с моли́твою свята́го Єфре́ма:

Го́споди і Влади́ко животу́ моє́му, дух уни́нія, небреже́нія, любонача́лія, сребролю́бія і праздносло́вія, чревобíсія, і гортанобíсія, і невоздержа́нія — не дажд ми. (Покло́н єди́н).

Дух же цілому́дрія і смире́нному́дрія, терпíнія, любве́ і слу́жби Твоє́я дару́й ми, недосто́йному рабу́ Твоє́му. (Покло́н єди́н).

Єй, Го́споди Ца́ру, дажд ми зрíти моя́ согріше́нія і не осужда́ти ми бра́та моє́го, я́ко Благослове́н єси́ во вíки. Амíнь. (Покло́н єди́н).

По сем глаголи́ моли́тву сíю со внима́нієм:

Многоми́лостиве і Преми́лостиве Го́споди і всего́ добра́ Да́телю, Чловеколю́бче і всея́ вселе́нния Ца́ру многоімени́тий, Влади́ко і Го́споди! Нищ і убо́г єсм аз, дерза́ю призива́ти чу́дноє, і стра́шноє, і свято́є ім’я́ Твоє́, єго́же вся твар Небе́сних Сил со стра́хом трепе́щут. Ни́зу на землí неізрече́ннаго Своє́го чловеколю́бія смотре́ніє удиви́л єси́. Посла́нієм возлюбле́ннаго Своє́го Отро́ка, Єго́же от безнача́лних нідр Своє́я Оте́ческія сла́ви неразлу́чним Божество́м отри́гнул єси́, да члове́ки со А́нгели в єди́н соста́в устро́їт. Пом’яни́, Го́споди, моє́го уни́нія смире́ніє, кал сий і персть, Тебе́, неізглагола́ннаго Свíта призива́ю. Не́мощію пло́ти обложе́н, ю́же Ти ми́лостивне поне́сл єси́, і сме́ртію Своє́ю от работи́ вра́жія свободи́л єси́ душа́ на́ша, да обíщники вся, вíрою яре́м работи́ Твоє́я на́ ся взе́мшая, сла́ви Своє́я сподоби́ши їх, от нея́же сатана́ льсти́вий отпаде́. Поми́луй м’я, омраче́ннаго гріхо́вними по́мисли. Возведи́ ум мой, удавле́ний те́рнієм лíности і ляди́ною непоко́рства. Утверди́ се́рдце моє́ по Тебí горíти, очи́ма мої́ма істо́чник слез посли́ і на коне́ц ісхо́да душа́ моє́я сотвори́ м’я безпоро́чна би́ти Своє́го уго́дника, наставля́я м’я к Тебí подвиза́тися усе́рдно. Пом’яни́, Го́споди, роди́теля моя́ милосе́рдієм Си, і вся бли́жняя моя́, і бра́тію, і дру́ги, і сосíди, і вся правосла́вния христія́ни, і спаси́ м’я моли́твами всіх святи́х. І прийми́ в честь сíя псалми́ і моли́тви, я́же глагола́х пред Тобо́ю за́ ся, і не ме́рзкости бу́ди со воздиха́нієм і моле́ніє сíє, я́ко Ми́лостив Сий і Чловеколю́бец, і Тебе́ со Єдиноро́дним Ти Си́ном і со Пресвяти́м Ду́хом — во Тро́йці Єди́ного Бо́га сла́вим ни́ні, і при́сно, і во вíки віко́м. Амíнь.

По сем:

Честнíйшую Херуви́м і Славнíйшую без сравне́нія Серафи́м, без істлíнія Бо́га Сло́ва ро́ждшую, Су́щую Богоро́дицу Тя велича́єм.

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Го́споди, поми́луй (два́щі).

Го́споди, благослови́.

А́ще поп, конча́єт свяще́нически. А́ще ли про́стий, конча́єт си́це:

Го́споди, Ісу́се Хри́сте, Си́не Бо́жий, моли́тв ра́ди Пречи́стия Ти Ма́тере, си́лою Че́стнаго і Животворя́щаго Креста́, святи́х Небе́сних Сил Безпло́тних, і Преподо́бних і Богоно́сних оте́ц на́ших, і свято́го Проро́ка Дави́да, і всіх святи́х поми́луй і спаси́ м’я грíшнаго, я́ко Благ і Чловеколю́бец.

По сем сотвори́ покло́нов єли́ко ти мо́щно по си́лі. Та́же в предстоя́нії моли́тв, іли́ в чте́нії Божестве́нних Писа́ній, іли́ в рукодíлії, упраздня́йся с оби́чною моли́твою:

Го́споди, Ісу́се Хри́сте, Си́не Бо́жий, поми́луй м’я грíшнаго.


Піснь Мойсеова | Зміст |

Можете використовувати такі теґи: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Будь ласка, не коментуйте з доменів mail.ru, yandex.ua/yandex.ru тощо. Ви не будете отримувати сповіщення про відповіді на відгуки. Не користуйтеся послугами країни-окупанта.


Пошук

Сторінки

Важливе

Останні відгуки

Канали RSS

Нагору