«Наша Парафія»

Парафія святого Архистратига Михаїла, Київ, Пирогів

 
БібліотекаБогослужбові книжки, церковні піснеспівиПсалтир давньоукраїнський 1643 року (в українській транслітерації)

Кафи́сма дев’я́тая

Псало́м 64
В коне́ц, псало́м пíсні Дави́дові,
пíснь Ієремíєва і Ієзекíїлева,
людíй прише́лствія, єгда́ хотя́ху ісходи́ти

2 Тебí подоба́єт пíснь, Бо́же, в Сіо́ні, і Тебí возда́стся моли́тва в Ієрусали́мі.

3 Усли́ши моли́тву мою́, к Тебí вся́ка пло́ть при́йдет.

4 Словеса́ беззако́нник премого́ша нас, і нече́стія на́ша Ти очи́стиши.

5 Блаже́н, єго́же ізбра́л і прия́л єси́, всели́тся во дво́ріх Твої́х. Іспо́лнимся во благи́х до́му Твоє́го, свята́ Це́ркви Твоя́,

6 ди́вна во пра́вді. Усли́ши ни, Бо́же, Спаси́телю наш, упова́ніє всім ко́нцем землí і су́щим в мо́рі дале́че.

7 Готова́яй го́ри крíпостію Своє́ю, препоя́сан си́лою,

8 смуща́яй глубини́ мо́рскія, шу́му волн Єго́ кто посто́їт? См’яту́тся язи́ци

9 і убоя́тся живу́щії в ко́нцех от зна́меній Твої́х, ісхо́ди у́тру і ве́черу украси́ши.

10 Посіти́л єси́ зе́млю і упої́л єси́ ю, умножи́л єси́ обогати́ти ю. Ріка́ Бо́жія наполни́ся вод. Уготова́л єси́ пи́щу їм, я́ко та́ко єст уготова́ніє.

11 Бра́зди єя́ упо́й, умно́жи жи́та єя́, в ка́плях єя́ возвесели́тся возсія́ющи.

12 Благослови́ши віне́ц лíту бла́гости Твоє́я, і по́ля Твоя́ наси́тятся ту́ка.

13 Разботíют кра́сная пусти́ні, і ра́достію хо́лми препоя́шутся.

14 Одія́шася о́вни о́вчії, і удо́лія умно́жат пшени́цу. Воззову́т, íбо воспою́т.

Псало́м 65
В коне́ц, піснь псалма́ воскресе́нія

2 Воспо́йте Господе́ві, вся земля́, по́йте же íмені Єго́, дадíте сла́ву хва́лі Єго́!

3 Рцíте Бо́гу: «Коль стра́шна дíла Твоя́, во мно́жестві си́ли Твоє́я солгу́т Тебí вра́зі Твої́.

4 Вся земля́ да покло́нит Ти ся і поє́т Тебí, да поє́т же íмені Твоє́му, Ви́шній!»

5 Прийдíте і ви́діте дíла Бо́жія, коль стра́шен во совíтех па́че сино́в члове́ческих.

6 Обраща́яй мо́ре в су́шу, в ріцí про́йдут нога́ми, та́мо возвесели́мся о Нем!

7 Облада́ющом си́лою Своє́ю вíку; о́ці Єго́ на язи́ки призира́єті: прогніва́ющії да не возно́сятся в себí.

8 Благословíте, язи́ци, Бо́га на́шего, і сли́шан сотворíте глас хва́ли Єго́.

9 Поло́жшаго ду́шу мою́ в живо́т, і не да́вшаго во см’яте́ніє ног мої́х.

10 Я́ко іскуси́л ни єси́, Бо́же, ражде́гл єси́ нас, я́коже раждиза́єтся сре́бро.

11 Вове́л ни єси́ в сіть, положи́л єси́ ско́рбі на хребтí на́шем.

12 Возве́л єси́ члове́ки на гла́ви на́ша, пройдо́хом скво́зі огнь і во́ду, і ізве́л єси́ нас в поко́й.

13 Вни́ду в дом Твой со всесожже́нієм, возда́м Тебí моли́тви моя́,

14 я́же ізреко́сті устнí мої́ і глагола́ша уста́ моя́ в печа́лі моє́й.

15 Всесожже́нія ту́чна вознесу́ Тебí с кади́лом і о́вни, возда́м Тебí воли́ с ко́зли.

16 Прийдíте, усли́шіте, і повíм вам, всі боя́щіїся Бо́га, єли́ка сотвори́ душí моє́й.

17 К Не́му усти́ мої́ми возва́х і вознесо́х под язи́ком мої́м.

18 Непра́вду а́ще возрíх в се́рдці моє́м, да не усли́шит мене́ Госпо́дь.

19 Сего́ ра́ди усли́ша м’я Бог, внят гла́су моле́нія моє́го.

20 Благослове́н Бог, íже не отста́ви моли́тви моє́я і ми́лости Своє́я от мене́!

Псало́м 66
В коне́ц, в пíніїх, псало́м пíсні Дави́дові

2 Бо́же, ущедри́ ни і благослови́ ни, просвіти́ лице́ Твоє́ на́ ни, і поми́луй ни.

3 Позна́ти на землí путь Твой, во всіх язи́ціх — спасе́ніє Твоє́.

4 Да ісповідя́тся Тебí лю́діє, Бо́же, да ісповідя́тся Тебí лю́діє всі.

5 Да возвеселя́тся і возра́дуются язи́ци, я́ко суди́ши люде́м правото́ю, і язи́ки на землí наста́виши.

6 Да ісповідя́тся Тебí лю́діє, Бо́же, да ісповідя́тся Тебí лю́діє всі.

7 Земля́ даде́ плод свой. Благослови́ ни, Бо́же, Бо́же наш.

8 Благослови́ ни, Бо́же, і да убоя́тся Єго́ всі ко́нци земля́!

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Псало́м 67
В коне́ц пíсні псало́м Дави́дові

2 Да воскре́снет Бог, і рази́йдутся вра́зі Єго́ і да біжа́т от лица́ Єго́ ненавидя́щії Єго́!

3 Я́ко іщеза́єт дим, да іще́знут, я́ко та́єт воск от лица́ огня́, та́ко да поги́бнут грíшници от лица́ Бо́жія.

4 А пра́ведници да возвеселя́тся, да возра́дуются пред Бо́гом, насладя́тся во весе́лії.

5 Воспо́йте Бо́гу, по́йте íмені Єго́, путь сотворíте возше́дшому на за́пади. Госпо́дь ім’я́ Єму́, і ра́дуйтеся пред Ним.

6 Да см’яту́тся от лица́ Єго́, Отца́ си́рих і Судії́ вдови́ць, — Бог в мíсті свято́м Своє́м.

7 Бог вселя́єт єдиноми́сльния в дому́, ізводя́й окова́нния в му́жестві, та́кожде прогніва́ющия, живу́щия во гро́біх.

8 Бо́же, єгда́ ісхожда́л єси́ пред людьми́ Свої́ми, єгда́ мимохожда́л єси́ в пусти́ні,

9 земля́ потрясе́ся, íбо небеса́ ка́нуша от лица́ Бо́га Сина́йна, от лица́ Бо́га Ізра́їлева.

10 Дожд во́лен отлучи́ши, Бо́же, достоя́нію Твоє́му, і ізнемо́же, Ти же соверши́л єси́ є.

11 Живо́тная Твоя́ живу́т на ней, уготова́л єси́ во бла́гости Твоє́й ни́щому, Бо́же.

12 Госпо́дь дасть глаго́л благовіству́ющим си́лою мно́гою.

13 Цар сил возлюбле́ннаго, ліпото́ю до́му разділи́ти кори́сть.

14 А́ще поспите́ посре́ді предíл, кри́лі голуби́ні посребре́ні, і междора́мія єя́ во блеща́нії зла́та.

15 Єгда́ разньстви́т Небе́сний царя́ на ней, осніжа́тся в Селмо́ні.

16 Гора́ Бо́жія, гора́ ту́чная, гора́ уси́реная, гора́ ту́чная.

17 Воску́ю непщу́єте, го́ри усире́ния? Гора́, ю́же благоволи́ Бог жи́ти в ней, íбо Госпо́дь всели́тся до конца́.

18 Колесни́ца Бо́жія тма́ми тем, ти́сяща гобзу́ющих, Госпо́дь во них в Синаї́ні во свято́м.

19 Возше́л єси́ на висоту́, пліни́л єси́ плінь, прия́л єси́ дая́ніє в члове́ціх, íбо непокаря́ющияся, є́же всели́тися.

20 Госпо́дь Бог благослове́н, благослове́н Госпо́дь день дне, поспíшит нам Бог спасе́ній на́ших.

21 Бог наш, Бог є́же спаса́ти, і Госпо́дня, Госпо́дня ісхо́дища сме́ртная.

22 Оба́че Бог сокру́шит гла́ви враго́в Свої́х, верх влас преходя́щих во прегріше́ніїх свої́х.

23 Рече́ Госпо́дь: «От Васа́на обращу́, обращу́ во глубина́х мо́рских,

24 я́ко да омо́чится нога́ твоя́ во кро́ві, язи́к пес твої́х, от враг от Не́го».

25 Ви́діна би́ша ше́ствія Твоя́, Бо́же, ше́ствія Бо́га, моє́го Царя́, íже во свято́м.

26 Предвари́ша кня́зі близ пою́щих, посре́ді дів тимпа́нниц.

27 Во церква́х благословíте Бо́га — Го́спода от істо́чник Ізра́їлевих!

28 Та́мо Веніами́н юно́ша в ужа́сі, кня́зі Іу́дові — влади́ки їх, кня́зі Завуло́ні, кня́зі Нефали́млі.

29 Заповíжд, Бо́же, си́лі Твоє́й, укріпи́, Бо́же, се, є́же соділа́л єси́ в нас.

30 От Це́ркве Твоє́я в Ієрусали́м Тебí принесу́т ца́ріє да́ри.

31 Запріти́ звíрем тро́стним, сонм ю́нец в ю́ницах лю́дских, є́же затвори́ти іскуше́нния сре́бром: раздруши́ язи́ки хотя́щия бра́нем.

32 При́йдут молитве́ници от Єги́пта, Ефіо́пія предвари́т ру́ку свою́ Бо́гу.

33 Ца́рствія зе́мная, по́йте Бо́гу, воспо́йте Господе́ві,

34 возше́дшому на не́бо небе́сноє на восто́ки. Се дасть гла́су Своє́му глас си́ли.

35 Дадíте сла́ву Бо́гові, на Ізра́їлі велелíпота Єго́, і си́ла Єго́ на о́блаціх.

36 Ди́вен Бог во святи́х Свої́х, Бог Ізра́їлев; Той дасть си́лу і держа́ву люде́м Свої́м. Благослове́ний Бог!

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Псало́м 68
В коне́ц о ізмíншихся.
Псало́м Дави́дові

2 Спаси́ м’я, Бо́же, я́ко внидо́ша во́ди до душа́ моє́я.

3 Углебо́х в тимíнія глубини́, і ність постоя́нія, прийдо́х во глубини́ мо́рскія, і бу́ря потопи́ м’я.

4 Утруди́хся, зовя́, ізмо́лче горта́нь мой, ісчезо́сті о́ці мої́ упова́ющу ми на Бо́га моє́го.

5 Умно́жишася па́че вла́сов гла́ви моє́я ненавидя́щії м’я всу́є, укріпи́шася вра́зі мої́, ізгоня́щії м’я без пра́вди, я́же не восхища́х, тогда́ воздая́х.

6 Бо́же, Ти увидíл єси́ безу́міє моє́, і прегріше́нія моя́ от Тебе́ не утаї́шася.

7 Да не постидя́тся о мні терпя́щії Тебе́, Го́споди, Го́споди Сил. Нíже да посрамя́тся о мні íщущії Тебе́, Бо́же Ізра́їлев.

8 Я́ко Тебе́ ра́ди прия́х поноше́ніє, покри́ срамота́ лице́ моє́.

9 Чужд бих бра́тії моє́й і стра́нен сино́м ма́тере моє́я,

10 я́ко ре́вность до́му Твоє́го сніде́ м’я, і поноше́нія понося́щих Ти нападо́ша на́ м’я.

11 І покри́х по́стом ду́шу мою́, і бисть в поноше́ніє мні.

12 І положи́х одія́ніє моє́ вре́тище — і бих їм в при́тчю.

13 О мні глумля́хуся сідя́щії во вра́тіх і о мні поя́ху пíющії вино́.

14 Аз же моли́твою моє́ю к Тебí, Бо́же, вре́м’я благоволе́нія. Бо́же, во мно́жестві ми́лости Твоє́я услиши́ м’я во íстині спасе́нія Твоє́го.

15 Спаси́ м’я от бре́нія, да не углебну́, ізба́ви м’я от ненавидя́щих м’я і от глубо́ких вод.

16 Да не пото́пит мене́ бу́ря во́дная, ні да пожре́т мене́ глубина́, нíже да сведе́т о мні рове́нник уст свої́х.

17 Усли́ши м’я, Го́споди, я́ко блага́ ми́лость Твоя́, по мно́жеству щедро́т Твої́х при́зри на́ м’я.

18 Не отврати́ лица́ Твоє́го от отро́ка Твоє́го, я́ко ско́рблю, ско́ро усли́ши м’я.

19 Во́ньми душí моє́й і ізба́ви ю, враго́в мої́х ра́ди ізба́ви м’я.

20 Ти бо вíси поноше́ніє моє́, і студ мой, і срамоту́ мою́. Пред Тобо́ю сут всі стужа́ющії ми.

21 Поноше́нія чая́ше душа́ моя́ і стра́сти, і ждах соскорб’я́щаго — і не бі, і утіша́ющих — і не обріто́х.

22 І да́ша во снідь мою́ желч, і в жа́жду мою́ напої́ша м’я о́цта.

23 Да бу́дет тра́пеза їх пред ни́ми в сіть і в воздая́ніє і в собла́знь.

24 Да помрачи́тіся о́чі їх не ви́діти, і хребе́т їх отню́д сляци́.

25 Проли́й на́ ня гнів Твой, і я́рость гнíва Твоє́го да пости́гнет їх.

26 Да бу́дет двор їх пуст, і в жи́лищих їх да не бу́дет живу́щаго.

27 Зане́ єго́ же Ти порази́л єси́, тíї погна́ша, і ко бо́лізні язв мої́х приложи́ша.

28 Приложи́ беззако́ніє ко беззако́нію їх, і да не вни́йдут во пра́вду Твою́.

29 Да потреб’я́тся от Книг Живо́тних, і со пра́ведними да не напи́шутся.

30 Нищ і боля́ єсм аз; спасе́ніє Твоє́, Бо́же, прия́ть м’я.

31 Восхвалю́ ім’я́ Бо́га моє́го с пíснію, возвели́чю Єго́ во хвале́нії.

32 І уго́дно бу́дет Бо́гу па́че те́лца ю́на, ро́ги ізда́юща і па́знокти.

33 Да узря́т ни́щії — і возвеселя́тся. Взищíте Бо́га — і жи́ва бу́дет душа́ ва́ша.

34 Я́ко усли́ша ни́щия Госпо́дь і окова́нних Свої́х не уничижи́.

35 Да восхва́лят Єго́ небеса́ і земля́, мо́ре і вся живу́щая в нем.

36 Я́ко Бог спасе́т Сіо́на, і сози́ждутся гра́ди Іуде́йстії, і вселя́тся та́мо, і наслідя́т ї.

37 І сíм’я рабо́в Твої́х удержи́т ї, і люб’я́щії ім’я́ Твоє́ вселя́тся в нем.

Псало́м 69
В коне́ц Дави́дові. Воспомина́ніє,
во є́же спасти́ м’я Го́споду

2 Бо́же, в по́мощ мою́ вонми́, Го́споди, помощи́ ми потщи́ся.

3 Да постидя́тся і посрам’я́тся íщущії душа́ моє́я, да возвратя́тся восп’я́т, і постидя́тся мисля́щії ми зла́я.

4 Да возвратя́тся а́біє стидя́щеся, глаголю́щії ми: «Бла́го же, бла́го же!»

5 Да возра́дуются і возвеселя́тся о Тебí всі íщущії Тебе́, Бо́же, і да глаголю́т ви́ну: «Да возвели́чится Госпо́дь», — люб’я́щії спасе́ніє Твоє́!

6 Аз же нищ єсм і убо́г: Бо́же, помози́ ми! Помо́щник мой і Ізбави́тель мой єси́ Ти, Го́споди, не закосни́!

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

По дев’я́той кафи́смі

Трисвято́є і по О́тче наш. Тропарí покая́нні:

Дія́нія моя́ і помишле́нія, гріхи́ і хотíнія взиска́ти хо́щеши іспита́нієм Свої́м, дажд ми по́мощ на покая́ніє ко до́брому отвíту, Хри́сте Бо́же, я́ко Человіколю́бец.

Сла́ва Отцу́, і Си́ну, і Свято́му Ду́ху.

Очисти́вий Петро́во отве́рженіє слеза́ми і митарю́ гріхи́ воздиха́нієм прости́вий, і мене́ поми́луй, Человіколю́бче Го́споди.

І ни́ні, і при́сно, і во вíки віко́м. Амíнь.

Ра́дуйся, із Нея́же непрело́жно Сло́во плоть бисть і всели́ся в ни. Ра́дуйся, Пречи́стая, Апо́столом і Му́чеником Ра́досте і вíрним Спасе́ніє, Ма́ти Христа́ Бо́га!

Го́споди, поми́луй (четирдеся́т).

Моли́тва дев’я́тая

Благодарю́ Тя, Го́споди Бо́же спасе́нія моє́го, я́ко вся тво́риши во благодія́ніє жи́зні моє́я. Да ви́ну к Тебí взира́ю, Спа́су і Благодíтелю душí моє́я, я́ко сохрани́л м’я єси́ грíшнаго і недосто́йнаго в жи́зні сей, от рожде́нія моє́го і досе́лі. Тобо́ю бо, Человіколю́бче, живу́, дви́жуся і єсм, і Твої́м спаси́тельним Промишле́нієм і ни́ні дви́гнухся на похва́лу і поклоне́ніє Пресвята́го íмене Твоє́го. Тíмже мо́лю Ти ся, Го́споди: дажд ми благода́ть і си́лу, да сподоблю́ся пíти Тебí разу́мно і моли́тися непреста́нно, во стра́сі і тре́петі своє́ спасе́ніє дíлающи. Усли́ши, Влади́ко, і поми́луй м’я, і сокруши́ под но́ги моя́ неви́димия враги́ і супоста́ти моя́. Я́ко Ти єси́ єди́н Помо́щник животу́ моє́му, да Тя восхвалю́ і благословлю́, ни́ні і во вíки. Амíнь.

Кафисма 8 | Зміст | Кафисма 10

Можете використовувати такі теґи: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Будь ласка, не коментуйте з доменів mail.ru, yandex.ua/yandex.ru тощо. Ви не будете отримувати сповіщення про відповіді на відгуки. Не користуйтеся послугами країни-окупанта.


Пошук

Допомога ЗСУ

Сторінки

Останні відгуки

Канали RSS


Українська Церковна Архітектура














Нагору