Кінцеві молитви
Молитви по закінченню читання Псалтиря або кількох кафизм
Досто́йно єсть, я́ко воíстину, блажи́ти Тя, Богоро́дицу, Присноблаже́нную, і Пренепоро́чную, і Ма́тер Бо́га на́шего. Честнíйшую херуви́м і Сла́внійшую без сравне́нія серафи́м, без істлíнія Бо́га Сло́во ро́ждшую, Су́щую Богоро́дицу Тя велича́єм.
О Тебí ра́дуєтся, Благода́тная, вся́кая твар: а́нгельский собо́р і человíческий род; освяще́нний Хра́ме і Ра́ю слове́сний, дíвственная похвало́, із Не́я же Бог воплоти́ся і младе́нец бисть, пре́жде вік сий Бог наш; ло́жесна бо Твоя́ престо́л сотвори́ і чре́во Твоє́ простра́нніє небе́с содíла. О Тебí ра́дуєтся, Благода́тная, вся́кая твар, сла́ва Тебí.
Святи́й Бо́же, Святи́й Крíпкий, Святи́й Безсме́ртний, поми́луй нас (тричі).
Сла́ва Отцу́, i Си́ну, i Свято́му Ду́ху, i ни́нi, i при́сно, i во вíки вiко́в. Амíнь.
Пресвята́я Тро́йце, поми́луй нас. Го́споди, очи́сти грiхи́ на́ша, Влади́ко, прости́ беззако́нiя на́ша, Святи́й, посiти́ i iсцiли́ не́мощi на́ша, íмене Твоє́го ра́ди.
Го́споди, поми́луй (тричі). Сла́ва Отцу́, i Си́ну, i Свято́му Ду́ху, i ни́нi, i при́сно, i во вíки вiко́в. Амíнь.
О́тче наш, íже єси́ на небесíх, да святи́тся iм’я́ Твоє́, да при́йдет Ца́рствiє Твоє́, да бу́дет во́ля Твоя́, яко на небесí, i на землí. Хлiб наш насу́щний даждь нам днесь i оста́ви нам долги́ наша, я́коже i ми оставля́єм должнико́м на́шим, i не введи́ нас во iскуше́нiє, но iзба́ви нас от лука́ваго.
Поми́луй нас, Го́споди, поми́луй на́с, вся́каго бо отвíта недоумíюще, сíю Ти моли́тву, я́ко Влади́ці, грíшнії прино́сим: поми́луй нас.
Слава Отцу́, і Си́ну, і Свято́му Ду́ху.
Че́стноє проро́ка Твоє́го, Го́споди, торжество́, не́бо Це́рков показа́, с человíки лику́ют а́нгели; того́ молитва́ми, Хри́сте Бо́же, в ми́рі упра́ви живо́т наш, да поє́м Ти: алилу́я.
І ни́ні, i при́сно, i во вíки вiко́в. Амíнь.
Мно́гая мно́жества мої́х, Богоро́дице, прегріше́ній, к Тебí прибіго́х, Чи́стая, спасе́нія тре́буя: посіти́ немощству́ющую мою́ ду́шу і моли́ Си́на Твоє́го і Бо́га на́шего да́ти ми оставле́ніє, я́же содíях лю́тих, єди́на Благослове́нная.
Го́споди і Влади́ко живота́ моє́го! Дух праздности, унинія, любоначалія і празднословія не даждь ми. Дух же ціломудрія, смиренномудрія, терпінія і любви дару́й ми, рабу́ Твоє́му.
Єй, Го́споди, Ца́рю! Дару́й ми зрíти моя́ прегріше́нія, і не осужда́ти бра́та моє́го, я́ко Благослове́н єси́ во вíки вíков.
Многоми́лостиве і Преми́лостиве Го́споди, і все́го добра́ Да́телю, Человіколю́бче, і все́я вселе́нния Ца́рю, многоімени́тий Влади́ко і Го́споди! Нищ і убо́г, дерза́ю призива́ти чу́дноє, і стра́шноє, і свято́є ім’я́ Твоє́, єго́же вся небе́сния си́ли со стра́хом трепе́щут. Ни́зу на землі́ неізрече́ннаго Твоє́го человіколю́бія смотре́ніє удиви́л єси. Посла́нієм возлюбле́ннаго Своє́го О́трока, єго́же от безнача́льних нідр Своє́я Оте́ческія сла́ви неразлу́чним Божество́м отри́гнул єси́, да челові́ки со а́нгели в єди́н соста́в устро́їт. Пом’яни Го́споди моє́го уни́нія смире́ніє, кал сий і персть, íже Тебе́, неізглаго́ланнаго Сві́та призива́ю, не́мощію пло́тскою обложе́н, ю́же Твой Син ми́лостивно поне́сл єси, і сме́ртію Своє́ю от рабо́ти вра́жія свободи́ ду́ші на́ша, да о́бщники вся́, ві́рою яре́м рабо́ти Твоє́я на ся взе́мшая, сла́ви Твоє́я сподо́бит їх, от нея́же сатана́ льсти́вий отпаде́. Поми́луй м’я, омраче́ннаго гріхо́вними по́мисли. Возведи́ ум мой, утісне́нний те́рнієм лі́ности, і злобо́ю непоко́рства. Утверди́ се́рдце моє́ по Тебі́ горíти, очи́ма мої́ма істо́чник слез посли́ і на коне́ц ісхо́да душí моє́я сотвори м’я безпоро́чна би́ти Своє́го уго́дника, наставля́я м’я к Тебі́ подвиза́тися усе́рдно. Пом’яни, Го́споди, роди́телі моя́ милосе́рдієм Твої́м, і вся́ бли́жнія моя́, і бра́тію, і дру́ги, і вся́ правосла́вния христіа́ни, і спаси́ м’я молитва́ми всі́х святи́х. І прийми́ в че́сть сíя псалми́ і моли́тви, я́же глаго́лах пре́д Тобо́ю за ся́ і о всíх, і не ме́рзко Ти бу́ди с воздиха́нієм моле́ніє сíє, Ти бо Ми́лостив єси Бог і Человіколю́бец, і Тебе́ Єди́наго в Тро́йці сла́вим: Безнача́льнаго Отца́ со Єдиноро́дним Твої́м Си́ном і со Святи́м Ду́хом, ни́ні, і при́сно, і во ві́ки віко́в. Амі́нь.
Посе́м:
Честнíйшую херуви́м і Сла́внійшую без сравне́нія серафи́м, без істлíнія Бо́га Сло́во ро́ждшую, Су́щую Богоро́дицу Тя велича́єм.
Слава Отцу́, і Си́ну, і Свято́му Ду́ху і ни́ні, i при́сно, i во вíки вiко́в. Амíнь. Го́споди поми́луй (тричі), благослови́.
Го́споди, Ісу́се Хри́сте, Си́не Бо́жий, моли́тв ра́ди Пречи́стия Твоє́я Матере, си́лою Че́стнаго і Животворя́щаго Креста́, і святи́х небе́сних сил безпло́тних, і преподо́бних і богоно́сних оте́ц на́ших, і свята́го про́рока Дави́да, і всі́х святи́х поми́луй і спаси́ м’я грі́шного, я́ко Благ і Человіколю́бец. Амінь.
